Her 100 Cerdd #28
Cyhoeddwyd Iau 4 Hyd 2018
Twthill
Yn weddillyn gweddillion
yn fy mro fy hun,
euthum gyda’r haid piod
i rwysg Caerdydd.
Ni fu’n hir nes bod
yr un hen wacter yn fy nal
ac edliw fy erthyl wreiddiau:
rhy rydlyd oedd cwlwm dur a glo.
Euthum felly lle mae’r cerrig yn ateb
iaith llwch fy mebyd,
i fin y culfor ehangaf ei orwel.
Yn froc môr o ddieithryn,
tiriais yn nghornel wag fy map
i brofi o’r newydd y wefr yn y tir,
i hau fy hanes air am air
i gwysi dröwyd yn haul
ysbeidiol ein tynged.
Er fy mod ar ddirdro,
ymglymaf yng ngwe ein hiaith
dros agendor o wahaniaeth.
Morgan Owen, 18.52 pm