Dewislen
English
.
Nod Sgwadiau `Sgwennu’r Ifainc yw dod o hyd i ysgrifenwyr disglair ym mhob rhanbarth – boed hynny trwy gyfrwng y Gymraeg neu’r Saesneg – a’u cyflwyno i rai o brif awduron a thiwtoriaid creadigol Cymru.

Mae’r sgwadiau yn croesawu plant sy’n dangos dawn newu addewid yn eu ysgrifennu creadigol, beth bynnag eu cefndir a’u perfformiad academaidd.

Fel rheol caiff y plant hyn eu dethol pan maent tua 9 – 10 oed gyda phrifathrawon ym mhob awdurdod lleol yn adnabod awduron ifanc talentog a brwdfrydig. Bydd ymgynghorwyr addysg yn gwneud y dewisiadau terfynol, a bydd pob Sgwad yn cwrdd, fel rheol, oddeutu tair neu bedair gwaith y flwyddyn ar gyfer sesiynau hyfforddi gan lenorion sydd â’r sgiliau cyfathrebu angenrheidiol i weithio gyda’r ifanc. Gobeithir wedyn cadw’r Sgwad hwnnw gyda’i gilydd hyd ddiwedd eu dyddiau ysgol.

Mae Sgwadiau ‘Sgwennu’r Ifanc wedi bod o fudd i bobl ifanc drwy:

 

  • Gynnig cyfleoedd i weithio gyda llenor proffesiynol y tu hwnt i amgylchedd y dosbarth
  • Annog pobl ifanc i ddatblygu eu sgiliau creadigol ac ysgrifennu
  • Ddarparu cyfleoedd i gwrdd a chymdeithasu gyda phobl ifanc o ysgolion eraill
  • Ddangos fod ysgrifennu creadigol yn weithgaredd cymdeithasol a hwyliog
  • Cynyddu hyder pobl ifanc yn eu gwaith
  • Galluogi pobl ifanc i ymateb yn greadigol, beirniadol ac emosiynol i’r byd o’u cwmpas
  • Datblygu sgiliau llythrennedd trwy greadigrwydd

Mae gweithgaredd Sgwad ‘Sgwennu arferol yn cynnwys gweithdy diwrnod o hyd gydag awdur proffesiynol mewn lleoliad wedi’i drefnu gan arweinydd y Sgwad. Mae’r gweithdai wedi eu targedu ar gyfer y grŵp oedran penodol hwnnw ac maent yn canolbwyntio ar greu gwaith newydd – unai yn unigol neu mewn grŵp.

Yn ogystal mae’r Sgwadiau ‘Sgwennu wedi cymryd rhan mewn gweithgareddau ychwanegol, yn aml i gyd-fynd â gwyliau neu ddigwyddiadau mawr eraill. Fe reolir y cyfleoedd ychwanegol hyn gan Llenyddiaeth Cymru. Mae partneriaid ar gyfer digwyddiadau ychwanegol yn y gorffennol yn cynnwys:

  • Artes Mundi yn Amgueddfa Genedlaethol Caerdydd
  • Maniffesto Pobl Ifanc, prosiect dros Gymru gyfan fel rhan o gynllun Awdur Pobl Ifanc Cymru
  • Kids Take Over – partneriaeth gyda British Council
  • Gŵyl y Gelli
  • Eisteddfod Genedlaethol
  • Gŵyl Lenyddiaeth Dinefwr

Mae pobl ifanc sydd wedi bod yn rhan o’r Sgwadiau ‘Sgwennu wedi symud ymlaen i ennill cystadlaethau ysgrifennu, wedi derbyn swyddi yn y sectorau celfyddydol, cyhoeddi a llenyddiaeth ac mae sawl un wedi ennill prif wobrau llenyddol yn Eisteddfod yr Urdd a’r Genedlaethol.

Mae Llenyddiaeth Cymru yn cynnig nawdd i drefnwyr tuag at weithdai’r Sgwadiau Sgwennu trwy’r cynllun nawdd Awduron ar Daith.

 

Os oes gyda chi ddiddordeb sefydlu Sgwad ‘Sgwennu yn eich ardal chi, cysylltwch â Llenyddiaeth Cymru ar:  029 2047 2266 / post@llenyddiaethcymru.org

Nôl i Ein Prosiectau