Dewislen
English
Cysylltu

I gyfarch Manon a Rhiannon

 

Ym Mehefin rhown ninnau – ein hwrê

I’n storïwyr gorau,

Ganddynt bu’r storïwyr iau

Yn cael aur rhwng y cloriau.

 

Arafwch, chi’r llyfrbryfed! Blaswch chi’r

Stori ac ystyried

Ei holl iaith a’i hyd a’i lled,

Llyfr cŵl – mae’n llafur caled.

 

Yn dy sêt, dwed, os wyt ti – am nofel

Yma’n haf Eryri

Heno i dy hudo di –

Dwy o Wynedd amdani!

 

Storïwr gonest, real – cymer wobr

Cymru wych yn fedal,

Rho ar bentan ran o’r wal

I hon, Manon, ym Mhennal.

 

Rho ar dy bentan, Rhiannon – wobr gain

Sgubor Goch ar d’union,

Est â ni ’leni ar lôn

Gynhyrfus i G’narfon.

 

Ar ran plant Cymru annwyl – da iawn, iawn!

Creu mwy nawr yw’r gorchwyl,

Ar dân bob mis cawn ddisgwyl

Am aur awduresau’r ŵyl.

 

 

Eurig Salisbury

Nôl i Cerddi Comisiwn