Her 100 Cerdd #12: Darllen
Cyhoeddwyd Mer 27 Medi 2017
Cais gan @AlwenThomas: Beth am gerdd i hybu darllen ymysg disgyblion?
Darllen
Mor anodd ydyw gweld yn glir
mewn byd sy’n gwrthod dweud y gwir;
a ninnau’n gymeriadau dof
yn colli rhyddid, colli cof;
’mond chwarae’n rhan yn stori fawr
yr hyn sy’n digwydd rhwng dau glawr;
fe gwyd ein hawdur ni y llen
a dawnsio wnawn i bib ei ben
ar lwyfan ei ddymuniad ef
heb godi protest na rhoi llef
na holi pam na beth na phwy
am nad yw ffaith ond ffuglen mwy;
nawr ewch i chwilio am y gwir –
dim ond mewn llyfr mae gweld yn glir.
– Gwynfor Dafydd, 15.32 pm