Dewislen
English

Lleisio – Cerdd i nodi Blwyddyn Ryngwladol Ieithoedd Cynhenid UNESCO

Cyhoeddwyd Gwe 1 Chw 2019 - Gan Llenyddiaeth Cymru

Mae Llenyddiaeth Cymru wedi comisiynu Ifor ap Glyn, Bardd Cenedlaethol Cymru i ysgrifennu’r gerdd hon, ‘Lleisio’, i nodi lansiad Blwyddyn Ryngwladol Ieithoedd Cynhenid UNESCO. Mae’r dathliad blwyddyn o hyd hwn yn gyfle arbennig i ddathlu diwylliannau amlieithog, bywiog Cymru a’i rhan ym mrodwaith ieithyddol cyfoethog y byd.

Am ragor o wybodaeth, ewch i: https://en.iyil2019.org/

 

 

Lleisio

(wrth lansio Blwyddyn Ryngwladol Ieithoedd Brodorol UNESCO 2019, yma yng Nghymru)

 

nomina si pereunt, perit et cognitio rerum

“os derfydd enwau,

derfydd hefyd dirnad pethau”.

Dwedwch felly, fawrion o wybodaeth,

ym mha fodd mae achub iaith?

 

Nid trwy’i chofnodi, na’i chysegru,

na chloi’i geiriau’n gacamwci gludiog

a lyno wrth y sawl

sy’n stelcian hyd ein cloddiau;

 

cans cadno wedi’i stwffio

yw pob Cymraeg llyfr;

ei ‘untroed oediog’ ni syfla mwy,

a’i lygaid gwydr sydd ddall.

 

Yn y llafar y mae ei lleufer;

a thafodau plant yw ei pharhâd.

 

Ifor ap Glyn

Bardd Cenedlaethol Cymru

27.1.19