Mae Elinor Davies yn asiant cyswllt yn Asiantaeth Lenyddol Madeleine Milburn, ac yn cynrychioli awduron sy'n ysgrifennu ffuglen fasnachol ac arloesol i oedolion. Dechreuodd ei gyrfa fel asiant gyda'r cwmni yn 2021 yn dilyn cwblhau gradd mewn Cyfryngau Cyhoeddi ym Mhrifysgol Oxford Brookes. Mae Elinor hefyd wedi ymgymryd â rolau golygu a mentora amrywiol gyda sefydliadau sy'n canolbwyntio ar awduron gan gynnwys Asian Women Writers, Jericho Writers ac Academi Faber.

"Mae’n anrhydedd cael gweithio’n agos gyda Llenyddiaeth Cymru a’r panel eleni i ddewis carfan pumed flwyddyn rhaglen Cynrychioli Cymru. Mae'r rhaglen yn rhoi llais i awduron heb gynrychiolaeth ddigonol mewn genres a disgyblaethau ysgrifennu amrywiol, ac yn chwarae rhan hanfodol wrth feithrin ac amlygu’r ystod eang ac amrywiol o dalent Gymreig sydd ar gael. Rwy’n edrych ymlaen at gael fy syfrdanu gan ymgeiswyr eleni."

Mae Andrew Ogun yn fardd ac yn gerddor o Gasnewydd. Andrew yw prif drefnydd BLM Gwent ac ef yw Asiant er Newid Cyngor Celfyddydau Cymru. Bydd Lucent Dreaming yn cyhoeddi ei gasgliad cyntaf o farddoniaeth, Slingshot, yn Hydref 2024.

Mae Lisa Blower yn awdur ac academydd arobryn a enwir gan Kit De Waal fel “etifedd naturiol Arnold Bennett”. Mae hi'n hyrwyddwr cryf o lenyddiaeth dosbarth gweithiol a lleisiau rhanbarthol, gan dalu gwrogaeth yn aml i The Potteries lle cafodd ei magu. Mae Lisa wedi ysgrifennu dwy nofel, Sitting Ducks (Fair Acre Press, 2016) - a gyrhaeddodd restr fer The Rubery Award, Gwobr Arnold Bennett a Not the Booker The Guardian - a Pondweed (Myriad Editions, 2020). Enillodd ei chasgliad o straeon byrion It's Gone Dark over Bill's Mother's (Myriad Editions, 2019) Wobr Arnold Bennett. Cyfrannodd i Common People (gol. Kit De Waal, Unbound, 2019), a bu’n golofnydd i The New Issue yn ystod 2020. Ymddangoswyd ei drama, ‘The Miner Birds’ sy’n coffau 40 mlynedd o waith Grŵp Gweithredu Gwragedd Glowyr Gogledd Staffs, am y tro cyntaf yn The New Vic yng Ngorffennaf 2024. Mae ganddi PhD mewn Ysgrifennu Creadigol a Beirniadol o Brifysgol Bangor ac mae'n darlithio mewn Ysgrifennu Creadigol ym Mhrifysgol Keele, lle mae'n parhau i hyrwyddo lleisiau rhanbarthol.

Yn enedigol o Lundain ac wedi ei fagu yn Ffynnon Taf mae Malachy Owain Edwards bellach yn byw yn Ynys Môn. Cafodd ei gofiant ffeithiol greadigol, Y Delyn Aur, ei gyhoeddi gan Wasg y Bwthyn ym mis Tachwedd 2023 a’i gynnwys ar restr fer Gwobr Llyfr y Flwyddyn 2024. Ynddo mae Malachy yn wynebu ei hunaniaeth hil-gymysg, aml-ddiwylliedig a chrefyddol wrth olrhain hanes ei deulu yn Iwerddon a Barbados. Ar hyn o bryd, mae’n ymchwilio i ddilyniant ei gyfres gofiannol ffeithiol greadigol, Paradwys Goll, a gyhoeddir yn 2025. Yn ogystal ag ysgrifennu llyfrau, mae’r awdur yn golofnydd i gylchgrawn Golwg.