Mae Beth â AuDHD ac yn awdur creadigol, hwylusydd clwb llyfrau ac eiriolwr lles o Gaerffili. Mae hi wedi trefnu a chyflwyno llawer o weithdai ysgrifennu, lles a gwybodaeth ynghylch niwroamrywiaeth, cynhwysiant ac ymwybyddiaeth o anabledd. Mae hi'n ysgrifennu am ei phrofiad o gael diagnosis anghywir o iechyd meddwl, rhagfarn rhywedd a diagnosis hwyr o niwroamrywiaeth, ac yn gwneud hynny gan ddefnyddio arddulliau traethawd 'meudwy' sy'n plygu genres a tarot i greu naratif beiddgar. Mae ei gwaith wedi'i gyhoeddi yn Happiful, The Independent, Mslexia, ac ym mlodeugerdd ar y gweill Bloomsbury, 'Divergent Writers: Disability, Illness, Neurodivergence, and Ableism in Creative Writing’.

“Rwy'n edrych ymlaen yn fawr at gyfarfod a gweithio ochr yn ochr â charfan o awduron anabl, byddar a niwroamrywiol i ddysgu oddi wrth ein gilydd, datblygu ein syniadau a rhoi'r hyder i'n gilydd rannu ein profiadau a'n gwirioneddau: sut rydym ni ein hunain yn eu gweld nhw, nid sut rydym wedi cael ein cyflyru i'w gweld. Fy nyhead yw cwblhau’r rhaglen gyda chynllun ar sut i symud ymlaen a rhyddhau fy ngeiriau i'r byd.”

Mae Demelza Monk yn wneuthurwr theatr amlddisgyblaethol Cernyweg-Gymraeg, gydag anableddau anweledig. Nhw yw cyd-sylfaenydd a chynhyrchydd creadigol Same Hat Theatre, cydweithfa theatr o Gaerdydd sy'n canolbwyntio ar gyd-greu hygyrch. Maent hefyd wedi gweithio gyda Taking Flight, Theatr Sherman a Birds of Paradise. Mae eu gwaith yn cael ei yrru gan feddylfryd cynhwysol ac ymrwymiad i herio normau'r diwydiant. Mae Demelza wedi bod yn ysgrifennu ers pan oeddent yn eu harddegau yn Sgwad ’Sgwennu Cernyw. Hyd yn hyn, maent wedi canolbwyntio ar farddoniaeth yn bennaf, ond maent yn dechrau ysgrifennu ar gyfer y llwyfan ar hyn o bryd. Mae eu profiad o niwroamrywiaeth a phoen cronig wedi dylanwadu'n ddwfn ar eu hysgrifennu, gyda delweddaeth synhwyraidd ddwys a greddf aflonyddgar. Maent wedi cyfrannu gwaith at 'Science Adventures: Deep Sea' Coppice Theatre a 'This Body Moves' Same Hat Theatre, ac maent ar hyn o bryd yn gweithio ar eu drama lwyfan gyntaf.

“Fy nyhead ar gyfer y rhaglen yw rhoi'r gorau i gynllunio a dechrau ysgrifennu. Dw i'n meddwl bod gen i ofn rhoi geiriau ar y dudalen, ac dw i'n gobeithio dysgu rhai technegau i fy helpu i oresgyn perffeithiaeth a diffyg awen creadigol.”

Mae Hiba Fatima Ahmad yn greadigwr rhyngddisgyblaethol, yn adroddwr straeon ac yn drefnydd cymunedol, ac mae ei gwaith yn cwmpasu barddoniaeth, ffeithiol a theatr. Mae eu gwaith yn trin llenyddiaeth fel dull ymholi, gan roi sylw i wleidyddiaeth ofodol anghyfiawnder, daearyddiaethau diddymiad, a bywydau ôl-drawiad trawma . Ar hyn o bryd mae hi'n datblygu sgript ffilm trwy raglen gyda Ffilm Cymru Wales ac yn cydweithio ar sgript theatrig sy'n archwilio cariad cwiar a chof rhyng-genhedlaeth sy'n gysylltiedig â Rhaniad India/Pacistan. Ochr yn ochr â hyn, mae hi'n gweithio'n rheolaidd gyda Taff Punks Collective ac Artistiaid Queer for Palestine gan hwyluso gweithdai gyda'r nod o greu lle ar gyfer mynediad a chysylltiad rhwng artistiaid ac awduron o unrhyw lefel.

“Mae ysgrifennu, i mi, yn ffordd o greu trafferth, nid er ei fwyn ei hun (rhan fwyaf o’r amser) ond fel ffordd o wrthod naratifau etifeddol a gofyn beth arall allai fod yn bosibl. Mae’r rhaglen hon yn teimlo fel cyfle i arafu, i gymryd anadl a dyfnhau fy nghrefft. Rwy’n edrych ymlaen at y cyfle i ysgrifennu ochr yn ochr ag awduron eraill, ac yn gobeithio meithrin perthnasau cryfach, cael ymdeimlad cliriach ohonof fy hun fel awdur, a creu gwaith sy’n teimlo’n fwy gonest, yn fwy hael, ac yn fwy awthentig i mi.”

Mae Jamie Harper Harrison yn byw yn Abertawe, ac yn ddiweddar mae ei gwaith wedi'i gyhoeddi yng nghylchgrawn These Pages Sing ac wedi’i pherfformio fel rhan o arddangosfa ysgrifennu Rough Diamonds. Drwy ysgrifennu, mae hi'n archwilio syniadau sy'n agos at ei chalon, gan gynnwys themâu LHDTC+, niwroamrywiaeth, salwch meddwl a byw gydag anabledd. Mae hi hefyd wedi'i hysbrydoli gan hanes diwylliannol cyfoethog a thirweddau Cymru, ac mae'r rhain yn aml yn ymddangos yn ei gwaith. Ar hyn o bryd, mae hi'n gweithio ar lawysgrif ar gyfer nofel ffantasi wedi'i lleoli mewn byd sy'n tynnu ar yr elfennau hyn i greu mytholeg newydd, a fydd yn cynnwys prif gymeriad niwroamrywiol.

“Rwy'n gobeithio y bydd y rhaglen hon yn rhoi'r offer a'r gofod i mi ailgynnau fy mherthynas â'm hysgrifennu ac ysgrifennu'r nofel yr hoffwn pe bawn i wedi'i darllen pan oeddwn i'n iau. Rwyf am ddysgu ysgrifennu am bobl â phob math o brofiadau byw gwahanol mewn ffordd sy'n fanwl ac yn gymhellol. Yn y pen draw, rwyf am ddatblygu fy ysgrifennu fel y gallaf ddefnyddio fy lens i droi profiadau fel fy rhai i yn rhywbeth cyffredinol i ddarllenwyr."

Mae Ruth Fabby [Gould gynt] wedi gweithio yn y sector celfyddydau ers dechrau'r 80au. Yn wreiddiol o Lerpwl, mae Ruth yn byw yn Nyffryn Conwy ar hyn i bryd. Mae'n gweithio fel ymarferydd creadigol llawrydd yn datblygu prosiectau celfyddydol, yn arwain gweithdai ysgrifennu ac yn dyfeisio/ysgrifennu ei gwaith ei hun. Sefydlodd Ruth DaDaFest, yr ŵyl gelfyddydau anabledd rhyngwladol enwog sydd wedi'i lleoli yn Lerpwl, ac roedd yn Gyfarwyddwr Artistig yno o 2001-2019, cyn ymgymryd â rôl Cyfarwyddwr Celfyddydau Anabledd Cymru. Hyfforddodd Ruth mewn celfyddydau perfformio, lleferydd a drama yn Ysgol Theatr Lerpwl a dechreuodd weithio ym maes anabledd a chelfyddydau Byddar. Mae hi'n siaradwr rhyngwladol cyson ar gelfyddydau anabledd, gan gyflwyno sgyrsiau, cadeirio sesiynau ac arwain gweithdai ledled y byd, gan gynnwys ledled y DU, Ewrop, yr Amerig, y Dwyrain Canol ac Asia. Yn Gymrawd Teithio Winston Churchill (2014), mae hi wedi meithrin cysylltiadau byd-eang parhaol â sefydliadau celfyddydau anabledd.

“Rwy'n awyddus i fagu hyder yn fy syniadau a’r modd rwy'n eu mynegi, gan archwilio dyfeisiau a naws i gyfoethogi fy ngwaith a’i wneud yn fwy perthnasol. Bydd y cyfle hwn yn rhoi’r arweiniad a’r gefnogaeth sydd eu hangen arnaf, ac rwyf mor awyddus i ddysgu gan yr amryddawn, Kaite O’Reilly.”

Mae Lisa yn awdur ac yn artist gweledol. Magwyd hi yn Hirwaun yng nghymoedd De Cymru, ac mae hi bellach yn byw yng Nghaerdydd. Mae hi’n credu’n gryf fod celf i bawb ac mewn amrywiaeth llais, ac mae ei gwaith yn cael ei lywio gan effeithiau'r salwch y mae hi'n byw gyda nhw a phrofiadau synhwyraidd AuDHD. Mae ei zine, 'O, Sis!', am geisio cael gofal am endometriosis, wedi ei brynu gan Gasgliad Wellcome, ac yn ddiweddar cyhoeddodd Art UK ei herthygl 'Drawing Strength', am gynrychiolaeth menywod a phŵer mewn lluniadu. Mae ganddi radd MA mewn Saesneg ac Ysgrifennu Creadigol o Brifysgol Metropolitan Caerdydd.

“Rwy'n edrych ymlaen at dderbyn cefnogaeth a mentora yn ystod y preswyliad. Rwy'n gobeithio dysgu sut i ddefnyddio fy mhrofiad byw i lunio cymeriadau ffuglennol, ac i gael syniadau a llwybrau ysgrifennu newydd wedi'u sbarduno gan awgrymiadau, adborth a gofod i arbrofi. Byddwn wrth fy modd yn cael help gyda gwaith plotio, ac rwyf hefyd yn gobeithio meithrin cymuned gyda fy nghyd-ysgrifenwyr.”

Mae Susanna Callaghan yn awdur ac artist sy'n byw yng Ngogledd Cymru. Dechreuodd ei thaith ysgrifennu gyda straeon byrion a chyhoeddwyd dwy mewn blodeugerdd yn 2018. Yna gweithiodd ar lyfr cyffro seicolegol a gyrhaeddodd rhestr hir Gwobr Undiscovered Writers PMJ 2023 a chyrraedd y 100 Uchaf yng Ngwobr Nofel Caerfaddon 2024. Cyrhaeddodd ei cherddi restr hir Cynllun Datblygu Beirdd Newydd 2024, a chyrhaeddodd ei llyfr cyntaf i bobl ifanc rhestr fer Cystadleuaeth Galwad Agored Guppy 2025. Ar hyn o bryd mae hi'n ysgrifennu straeon byrion, yn golygu ei llyfr plant ac yn gweithio ar stori ddirgel hanesyddol. https://susannacallaghan.co.uk/

“Rwyf eisiau fy nghymeriadau fod yn unigolion unigryw gyda'r holl gymhlethdod, amrywiaeth a llanast sy'n gwneud pobl yn ddiddorol. Rwy'n gobeithio y bydd y rhaglen hon yn llenwi’r bylchau yn fy mhrofiad o eraill ac yn rhoi'r hyder i mi archwilio a rhannu fy ffyrdd i o brofi'r byd.”

Mae Shazz yn awdur o Ynys Môn. Pan chwalodd ei gyrfa ym maes iechyd, dilynodd gwrs Ysgrifennu Creadigol y Brifysgol Agored. Mae hi wrthi’n gweithio ar nofel sydd yn archwilio’r thema o weddwdod, gan ddefnyddio hiwmor tywyll. Mae hi'n archwilio effeithiau positifrwydd gwenwynig (toxic positivity) ac effaith stereoteipiau cymdeithasol sefydledig a stigma ynghylch galar. Mae hi hefyd yn ysgrifennu ei hunangofiant am fenyw sy'n teithio ar ei phen ei hun gyda heriau iechyd amrywiol. Mae ei hunangofiant yn canolbwyntio ar yr amser a dreuliodd yn teithio trwy Bacistan yn y 90au cynnar. Shazz oedd enillydd gwobr ysgrifennu JKP yn 2025.

“Rwyf am archwilio sut rwy'n cyfleu realiti byw gydag amrywiaeth o anableddau, cyflyrau iechyd meddwl a chorfforol cronig fel bod y darllenydd yn teimlo empathi, realaeth ac yn meithrin dealltwriaeth. Rwyf am roi cyfle i ddarllenwyr gwestiynu eu profiad eu hunain o werthoedd a barnau cymdeithasol heb ragfarn ac o safbwynt caredigrwydd. Rwy'n gweld y cyfle hwn, nid yn unig i archwilio a datblygu fy ysgrifennu, ond hefyd fel cyfle i gofleidio fy anableddau fy hun, yn hytrach na chuddio neu ymddiheuro drosof fy hun. Rwy'n gweld hyn fel cyfle amhrisiadwy wrth ddatblygu fy ngwirionedd fel awdur ac awdur uchelgeisiol.”