LLIF

Daw 9 awdur o’r 14 o wledydd amrywiol yn Ewrop: Y Swistir, Catalonia – Sbaen, Yr Almaen, Estonia, Latfia, Slofenia,  Hwngari, Ynysoedd y Ffaröe, a Ffrisia – Yr Iseldiroedd. Mae Llenyddiaeth Cymru yn ddiolchgar i sawl sefydliad amrywiol, dan arweiniad ac anogaeth EUNIC Llundain, am noddi ymweliad yr awduron rhain â Chymru.

Mae’r 5 awdur arall yn cynrychioli rhai o feirdd mwyaf sefydliedig a disglair Cymru – yn lysgenhadon dros ein llenyddiaeth, dros y Gymraeg, a dros hynodrwydd Cymru fel gwlad arloesol ei chreadigrwydd.

Ymysg rhai o brif themâu yr encil y mae’r argyfwng hinsawdd, ecoleg, byd natur a chymdeithas, a bydd sawl un o’r awduron yn edrych ar y pynciau rhain drwy ffenestr ieithoedd a thafodieithoedd lleiafrifol yn cynnwys y Gymraeg, y Gatalaneg, y Ffaroeg, y Latgaleg a mwy.

Bydd rhaglen o sgyrsiau, teithiau a gweithdai yn cael ei threfnu ar gyfer y garfan i ysgogi cydweithio, rhannu ymarfer da, a phrosiectau newydd dros Ewrop.

Cewch ddarllen rhagor am yr awduron isod, ynghyd â phartneriaid, noddwyr a chefnogwyr preswylfa LLIF.

Edrychwn ymlaen i gael rhannu peth o hanes y breswylfa, ynghyd â chynnyrch creadigol ac argraffiadau’r awduron dros y flwyddyn sydd i ddod.

Mae Llenyddiaeth Cymru yn hynod ddiolchgar i’n cyllidwyr a’n partneriaid sydd wedi gwneud y cyfle hwn yn bosibl: EUNIC Llundain (a naw o’u haelodau), Llywodraeth Cymru, Celfyddydau Rhyngwladol Cymru trwy Gyngor Celfyddydau Cymru, y Cyngor Prydeinig, Llenyddiaeth dros Ffiniau, a Gŵyl y Gelli.