Panel Cyhoeddwyr Saesneg Cymru
Nos Fawrth 21 Hydref
6.00– 7.15 pm
Iaith y sesiwn: Saesneg (dim gwasanaeth cyfieithu)
Ydych chi yn teimlo’n barod i gyhoeddi eich gwaith? Neu efallai eich bod yn cychwyn ar eich taith fel awdur, ac yn chwilfrydig i ddysgu mwy am y byd cyhoeddi.
Ymunwch â golygyddion o rai o brif weisg Saesneg eu hiaith Cymru i ddysgu mwy am y broses o gomisiynu, golygu a chyhoeddi eich gwaith. Sut mae gyrru llawysgrif i wasg? Pa wasg sydd fwyaf addas i chi? Sut fath o waith mae ein gweisg yn edrych amdano ar hyn o bryd? Beth sydd angen cofio ei wneud, a beth y dylid ei osgoi? Bydd cyflwyniadau gan gynrychiolwyr o Broken Sleep Books, Lucent Dreaming a Honno, yna cewch wahoddiad i yrru cwestiynau at y panel i’w hateb yn fyw ar y noson. COFRESTRU
Gwarchod yr Hwylusydd Creadigol
Dydd Mercher 5 Tachwedd
12.00 – 1.00 pm
Siaradwyr: Gwennan Mair Jones, Patrick Jones, Emma Smith-Barton
Iaith y sesiwn: Cymraeg a Saesneg, gyda gwasanaeth cyfieithu ar y prydMae’r celfyddydau yn gallu bod yn llesol. Mae nifer o artistiaid wedi hyfforddi i ddefnyddio eu crefft i weithio yn ofalus gydag unigolion a grwpiau amrywiol er mwyn cyfrannu’n gadarnhaol at eu iechyd a’u llesiant. Mae cyflwyno’r grefft o ysgrifennu creadigol, neu ganu, actio a chreu celf i unigolion bregus yn gallu cynnig dihangfa, dull o archwilio teimladau ac emosiynau, cyfle i gymdeithasu a llawer mwy. Ond drwy’r gwaith hwn, caiff yr artistiaid – yr hwyluswyr creadigol – yn aml eu cyflwyno i sefyllfaoedd heriol a chymhleth. Bydd y sesiwn hon yng nghwmni tri hwylusydd hynod brofiadol yn archwilio sut y gall artistiaid edrych ar ôl eu llesiant eu hunain a’i gilydd wrth gyflawni prosiectau celf er iechyd a llesiant.
Bydd y sgwrs o ddiddordeb i unrhyw awdur neu artist sydd yn, neu â diddordeb mewn, cynnal gwaith cyfranogol. Gall hyn gynnwys weithio mewn ysgolion, yn y byd iechyd, gydag elusennau amrywiol, neu gynnal weithdai celf mewn cymunedau. COFRESTRU
Dathlu Bardd Plant Cymru a Children’s Laureate Wales 2023-2025: Nia Morais ac Alex Wharton
Nos Iau 20 Tachwedd
7.00 – 8.00 pm
Iaith y sesiwn: Cymraeg a Saesneg, gyda gwasanaeth cyfieithu ar y pryd
Ymunwch â Bardd Plant Cymru 2023-2025 Nia Morais, a’r Children’s Laureate Wales 2023-2025 Alex Wharton ychydig wythnosau ar ôl pasio’r awenau i’w holynwyr i ddathlu dwy flynedd brysur o ysbrydoli plant Cymru drwy lenyddiaeth. O gynnal gweithdai digidol gyda phobl ifanc ym Mhalesteina, i gerdded arfordir Môn yn ymweld ag ysgolion ar hyd y ffordd, bydd sawl stori gan y ddau fardd i’w rhannu. Cawn hefyd o bosib gyfle i holi am y stori enwog honno – sut ar wyneb y ddaear y glaniodd cerdd gan Alex garped coch y Met Gala yn 2024, wedi ei wnïo tu mewn i siaced Lewis Hamilton. Ymunwch â ni i ddiolch i Nia ac Alex, i ddathlu eu llwyddiannau, ac i ddysgu mwy am y rhyfeddod a’r hud o gyflwyno geiriau a barddoniaeth i blant o bob oed. Bydd cyfle i ddysgu mwy am y gwaith o fynd â llenyddiaeth i ysgolion, a datblygu eich sgiliau fel hwyluswyr ysgrifennu creadigol. COFRESTRU
Cylchgronnau Cymru
Nos Fawrth 2 Rhagfyr
6.00 – 7.15 pm
Iaith y sesiwn: Cymraeg a Saesneg, gyda gwasanaeth cyfieithu ar y pryd
Ymunwch â rhai o olygyddion cylchgronau llenyddol Cymru ynghyd â sefydlydd platfform AM i ddysgu mwy am y cyfryngau creadigol sy’n bodoli i roi llwyfan i chi ar gyfer gwaith creadigol. Dysgwch fwy am y broses gyflwyno, a’r ffordd orau o baratoi eich gwaith i’w ystyried. Beth mae’r gwahanol olygyddion yn chwilio amdano ar hyn o bryd? Beth yw’r broses? Yn dilyn cyflwyniad byr gan bob golygydd, byddwn yn gwahodd cwestiynau gan y gynulleidfa. Bydd y sesiwn hon yn cynnwys golygyddion o Folding Rock, AM, Poetry Wales a mwy. COFRESTRU
Cip ar weisg tu hwnt i Gymru
Nos Fawrth 9 Rhagfyr
6.00 – 7.00 pm
Iaith y sesiwn: Saesneg (dim gwasanaeth cyfieithu)
Yn dilyn sesiynau gan weisg Cymru yn gynharach yn y rhaglen, bydd cyfle yn y sesiwn hon i glywed gan awduron sydd wedi cyhoeddi dros y ffin ynghyd â’u golygyddion. Beth oedd cymhelliant yr awduron? Sut fath o ddiddordeb sydd gan weisg tu hwnt i Gymru mewn lleisiau a straeon o ac am Gymru? Sut mae’r diwydiant llenyddiaeth a chyhoeddi yn cymharu rhwng Cymru a gweddill y byd? Yn dilyn y sgwrs bydd cyfle i’r gynulleidfa yrru cwestiynau i aelodau’r panel. COFRESTRU
Cynrychiolaeth a’n Traddodiad Barddol
Nos Fercher 14 Ionawr
7.00 – 8.00 pm
Siaradwyr: Menna Elfyn, Jo Heyde, Hammad Rind, Brennig Davies
Iaith y sesiwn: Cymraeg (dim gwasanaeth cyfieithu)
 hithau’n Hen Galan, byddwn yn dwyn ynghyd panel o feirdd i drafod ein traddodiad barddol. Yn un o’r nodweddion sy’n gwneud Cymru a’r Gymraeg yn unigryw dros y byd – bydd cyfle i ni ganu mawl i ganrifoedd o’r gynghanedd, o farddoni a llenydda. Ond bydd cyfle hefyd i ni graffu a thrafod cynrychiolaeth o fewn ein llenyddiaeth. A oes clwydi neu rwystrau sy’n atal lleisiau o bob math i ymuno â’r canon creu cerddi? Bydd cyfle i drafod menywod yn ennill Cadeiriau, Talwrn y Beirdd a Thalwrn y Gêirdd, a’r tebygrwydd rhwng canu marwnadol Cymraeg, Persieg ac Wrdw... COFRESTRU
Asiantiaid Llenyddol
Nos Fawrth 20 Ionawr
6.00 – 7.00 pm
Siaradwyr: Anwen Hooson, Cathryn Summerhayes
Iaith y sesiwn: Cymraeg a Saesneg, gyda gwasanaeth cyfieithu ar y pryd
Ymunwch â dwy asiant lenyddol o Gymru yn wreiddiol, sydd bellach yn byw ac yn gweithio yn Llundain. Bydd cyfle i ddysgu mwy am rôl yr asiant llenyddol, a sut y maent yn ffitio mewn i fecanwaith cymhleth y byd cyhoeddi. Bydd Anwen a Cathryn yn rhoi gair o gyngor ar sut i ddod o hyd i’r asiant cywir, ac yn trafod eu gwaith gyda rhai o’r awduron mwyaf poblogaidd sy’n cyhoeddi ar hyn o bryd. Bydd cyfle i drafod y gwahaniaethau rhwng y bydoedd cyhoeddi yng Nghymru a thu hwnt a chyfle i’r gynulleidfa ofyn cwestiynau. COFRESTRU
Dathlu Enillwyr Llyfr y Flwyddyn
Nos Fawrth 2 Chwefror
6.00 – 7.00 pm
Iaith y sesiwn: Cymraeg a Saesneg, gyda gwasanaeth cyfieithu ar y pryd
Ymunwch â Iola Ynyr a Carys Davies, enillwyr Llyfr y Flwyddyn 2025 i drafod eu cyfrolau buddugol ac i drafod effaith cipio’r brif wobr genedlaethol ar eu gyrfaoedd fel awduron. Bydd cyfle i drafod eu datblygiad a’u taith fel awduron, a holi sut mae mynd ati i ysgrifennu a chyhoeddi cyfrol sy’n haeddiannol o deitl Llyfr y Flwyddyn. Bydd hwn yn gyfle i edrych yn ôl yn ar yr haf braf, yn gyfle arall i ddathlu camp Iola a Carys, a thrafod sut all y byd ysgrifennu yng Nghymru baratoi awduron i gyrraedd uchafbwynt fel cipio gwobr o’r fath a chynrychioli llenyddiaeth ein cenedl ar fap y byd. COFRESTRU
Golwg ar Gynllun Iwerddon: Incwm Sylfaenol i’r Celfyddydau
Prynhawn Iau 5 Mawrth
12.00 – 1.00 pm
Iaith y sesiwn: Cymraeg a Saesneg, gwasanaeth cyfieithu ar y pryd
Yn y sesiwn hon, byddwn yn edrych ar gynllun Incwm Sylfaenol i’r Celfyddydau Llywodraeth Iwerddon, sydd wedi bod yn helpu artistiaid i ddelio ag incwm ansicr ac i’w hatal rhag gadael y sector am resymau economaidd ers 2022. Mae’r cynllun yn cynnig taliad wythnosol o €325 i 2,000 o artistiaid a ddewiswyd ar hap. Gyda’r cynllun peilot yn dod i ben ym mis Chwefror 2026, bydd hwn yn gyfle i archwilio sut mae’r cynllun yn gweithio, yr effaith y mae wedi’i gael ar artistiaid a’r sector ddiwylliannol yn Iwerddon, ac i drafod sut fyddai cynllun tebyg yn gweithio yng Nghymru.
Bydd y panel yn cynnwys cynrychiolydd o Dîm Ymchwil Incwm Sylfaenol i’r Celfyddydau yn Llywodraeth Iwerddon; yr awdur Gwyddelig, Elaine Garvey, sy’n derbynnydd y cynllun; a lluniwr newid o Gymru. Cyhoeddir rhagor o fanylion yn fuan. COFRESTRU