Bardd ac awdur o Gaernarfon ydi Rhys Iorwerth. Enillodd Gadair yr Eisteddfod Genedlaethol yn 2011, Coron yr Eisteddfod Genedlaethol yn 2023, a gwobr barddoniaeth Llyfr y Flwyddyn 2015 am ei gasgliad, Un Stribedyn Bach. Cyhoeddodd ei gyfrol ryddiaith gyntaf, Abermandraw, yn 2017. Yn 2020, enillodd Wobr Michael Marks am Farddoniaeth yn yr Ieithoedd Celtaidd am ei bamffled, Carthen Denau. Mae’n perfformio’n gyson mewn digwyddiadau llenyddol ledled Cymru, ac yn un o sefydlwyr nosweithiau Bragdy’r Beirdd yng Nghaerdydd a Chaernarfon. Mae hefyd yn dysgu dosbarth cynganeddu ac yn dalyrnwr ac ymrysonwr gyda thimau Dros yr Aber a’r Deheubarth.
