Irram ydw i o Gaerdydd. Dw i wedi bod yn ysgrifennu ers pan oeddwn yn fy arddegau, ac yn 2023 fe wnes i wireddu fy mreuddwyd o ddod yn awdur cyhoeddedig. Dysgais Gymraeg fel oedolyn ac ar hyn o bryd mae gen i ddwy golofn gyda chylchgrawn ar-lein y dysgwr Cymraeg Lingo360 (colofn iechyd wrth i mi weithio i’r GIG a cholofn hanes gan fy mod wrth fy modd â hen bethau!). Dw i’n gyfrannwr storiau byr i Cip, cylchgrawn yr Urdd i blant. Rwyf hefyd yn ysgrifennu erthyglau Saesneg i Bylines Cymru. Mi wnes i gyhoeddi dau lyfr dwyieithog yn 2024 – casgliad o farddoniaeth ‘Cymraeg, Asiaidd a Balch’ a chasgliad o straeon byrion ysbryd ‘Fe Ddaw Atom Ni Oll’, sydd ar hyn o bryd wedi’u stocio mewn siopau llyfrau annibynnol yn Ne Cymru ac i gael eu stocio’n ehangach gan Gyngor Llyfrau Cymru. Yn 2025 mi wnes i gyhoeddi casgliad o straeon arswyd, ‘What Lies Beyond’ a fy nghasgliad cyntaf o straeon i blant o’r enw ‘Betsi, The Cool Cat and other stories’. Ar hyn o bryd rwyf yn gwneud gwaith ymchwil ar gyfer cofiant hanesyddol, a fydd yn cael ei gyhoeddi yn 2027.
