Yma’n y drindod wyrdroedig
rhwng canser dreng, gwaed drud a gobaith rhad,
byddwn yn gefn i ti, wrth herio’r nos.
Cyd-gerddwn â thi
wrth groesi unigeddau’r haint,
sy’n crino dy ffydd â’i haul blin;
a gwasgwn dy law
wrth syllu i’r gwacter
sydd rhwng y sêr…
Ac yn rhwymau’r siwrnai enbyd hon,
oedwn,
a chymryd ein gwynt,
gan ddiolch i’r rhai
a loywodd y llwybrau hyn o’n blaen,
pan oedd covid yn bygwth eu cau;
cofiwn am y sawl
y bu pen eu taith cyn pryd,
a cherddwn ymlaen er eu mwyn, nes cyrraedd ein nod…
A bob tro y cenir y gloch,
bydd calon goll
yn ymfalwnio’n rhydd, drwy’r glesni pell…
Ifor ap Glyn
Bardd Cenedlaethol Cymru
(Comisiynwyd gan Ymddiriedolaeth Felindre i nodi ymroddiad staff a gwirfoddolwyr yr ysbyty yn dilyn blwyddyn o bandemic Covid-19.)