Ffydd

“edges are where meanings happen” – Christopher Meredith

Yma cawn encilio o’r byd,

ar ororau’r tir a’r tonnau;

mewn tŷ hen, ar odre hanes,

a’r coed yn anwes amdano.

Down yma’n gymdeithas meudwyon

i chwilio’n heneidiau lleyg,

i ail-gyfryngu’r synhwyrau oll,

i ymollwng i ryddm y creu…

Ac yn y ffreutur, bydd syniadau

yn ffrwtian o gwmpas bwrdd;

bydd straeon yn codi fel bara i’r hirbryd;

a cherddi fel cwrw, i dorri ein syched.

Myfyriwn wedyn, mewn tŷ gwydr geiriau,

chwynnu rhwng ein brawddegau,

didoli llinellau, a’u hail-blannu

(nid ydyw wastad yn hawdd).

Ac yn y llyfrgell, cyd-ganwn â’r urddedig rai;

sancteiddiwn ein horiau â gweddïau inc

ac yna meudwyo…

i geisio ymylon ein hunain,

a dal y dwyfol o’r newydd, mewn gair…

Oherwydd, i’r cwfaint seicadelig hwn,

y down i feithrin ein ffydd;

i gael ein dyrchafu, cyn mentro i’r gell,

lle meiddiwn ddychmygu

– ac hwyrach methu –

ac yna, methu’n well…