Os t’isio plannu caneuon,
lle gwell na’r sioe flynyddol hon,
sy’n codi’i stondinau ar draws y dre
i’r alawon gael ei lordio-hi?
Ac yma bydd nodau di-ri
yn cordio fel hen ffrindiau,
a lliwiau aflafar y bît
yn troi’n ara’ o gwmpas dy ben
fel basgedi blodau ‘di bwrw’u tjeiniau…
Os t’isio garddio melodïau,
pridd cyndyn tref fel hon sydd orau
lle gall riff ymwreiddio
mewn craciau concrid
ar stadau rafin, yn bafin ryddid.
A bydd sawl cyfle am sgyrsiau-rhandir yma
am sut mae’r lleill yn cwrteithio’u talentau,
ac yn impio dylanwadau,
wrth wylio lleisiau
a chlywed eu lluniau…
Ac os wyt ti
isio tyfu tiwns,
yn Wrecsam mae’r banc hadau;
ac wedi tridiau gogoneddus
yn gwrando cân y blodau,
awn o’ma un ac oll
hefo’n pacad newydd o syniadau
yn barod at wanwyn nesa
Ifor ap Glyn
Bardd Cenedlaethol Cymru
(i ddathlu 10fed ŵyl Focus Wales yn Wrecsam, 7-9.10.21)