Weldio

Bu hwn mewn llefydd poeth y diawl,

cyn ffoi,

ond bellach mae’n dewino tân

er creu.

Mae’r geiriau newydd

yn tasgu nawr fel gwreichion:

“Wedi beni”; “bant â’r cart”

ac nid gwneud trêlars

wna Mohammed ger Tregaron,

ond asio bywyd newydd

fel llen-fetel.

Ac yn y gwaith,

mae’r Gymraeg yn arcio’n llachar,

wrth i’r bois dynnu’u masgiau

a thorri bara.

Ifor ap Glyn
Bardd Cenedlaethol Cymru

(i Mohammed Karkoubi, ffoadur o Syria

a enillodd wobr am ei Gymraeg, Gorffennaf 2019)