Rhoi Sylw i Restr Fer Llyfr y Flwyddyn: Sioned Erin Hughes

Cyhoeddwyd Mer 11 Meh 2025 - Gan Llenyddiaeth Cymru

Holi’r Awdur: Sioned Erin Hughes

Pryd wnaethoch chi sylweddoli gyntaf eich bod chi eisiau bod yn awdur?

Adeg sgwennu fy MA mewn Ysgrifennu Creadigol – roedd cyfran fawr o’r portffolio yn waith wnes i ei gynnwys yn Rhyngom!

Beth sy’n eich ysbrydoli chi?

Pobl, anifeiliaid, ffilmiau, llyfrau, byd natur a’m plentyndod.

Beth yw eich hoff lyfr neu awdur?

Yn y Gymraeg fy hoff lyfrau ydi Wele’n Gwawrio, Angharad Tomos, Rhwng Noson Wen a Phlygain, Sonia Edwards ac yn hon bu afon unwaith, Aled Jones-Williams. O ran barddoniaeth, Marged Tudur a’i chyfrol Mynd. Yn y Saesneg, mae Mary Oliver yn ddylanwad mawr, ac yn fwy diweddar, meddylfryd Andrea Gibson ac Ocean Vuong hefyd. Fy hoff lyfrau yn y Saesneg ydi Letters to a Young Poet gan Rainer Maria Rilke, Faith, Hope and Carnage gan Nick Cave a Seán O’hagan, I Am, I Am, I Am gan Maggie O’farrell a The Bell Jar gan Sylvia Plath.

Hoff lyfr o’ch plentyndod?

Stori, Stori Hen Blant Bach gan Helen Craig, addasiad Emily Huws.

Beth ysgogodd y syniad ar gyfer eich llyfr?

Roedd meddwl sgwennu 365 darn creadigol mewn blwyddyn yn anodd, a dyna pam wnes i fwrw ati a gwneud, a bod yn onest. Ro’n i wedi gwneud pethau anoddach, felly roedd hon yn sialens fach newydd a ffordd o ddysgu mwy am fy nygnwch a’m disgyblaeth fy hun.

Allwch chi ddarllen ychydig o’ch llyfr inni os gwelwch yn dda?

Pwy ddylai ddarllen eich llyfr a pam?

Llyfr ar gyfer yr adegau lle mae darllen nofel yn teimlo’n ormod o fynydd, efallai. Mae pobl hefyd wedi dweud ei fod yn llyfr da i’w gael wrth ochr y gwely a darllen un darn y noson.

Oes gennych chi waith/digwyddiad arall ar y gweill?

Oes! Mae gen i gyfrol dwi wedi ei golygu ar fin cael ei chyhoeddi ac mae gen i gyfrol o farddoniaeth yn cael ei rhyddhau fis Medi. Dwi’n mynd yn ôl i ganolbwyntio ar fy rhyddiaith wedyn – mae gen i gyfrol allan yn 2026 a cyfres o lyfrau i blant, gobeithio.