Mae ‘Summer Soirées’ Dylan Thomas yn gyfres o ddigwyddiadau llenyddol gyda’r nos a drefnir ar y cyd gan write4word ac Ysgol Saesneg ac Ysgrifennu Creadigol Prifysgol Cymru Y Drindod Dewi Sant. Cefnogir y digwyddiadau gan Llenyddiaeth Cymru ac fe’u cynhelir ochr yn ochr ag Ysgol Haf Ryngwladol Dylan Thomas. Mae hon yn rhaglen ysgrifennu creadigol breswyl ar gyfer myfyrwyr MFA Americanaidd wedi’i chyfarwyddo gan yr awduron Pamela Petro a Dominic Williams. Mae mynediad am ddim i bob digwyddiad ac yn agored i’r cyhoedd ac yn arddangos rhai o awduron proffesiynol gorau Cymru, llawer ohonynt â phroffiliau rhyngwladol, mewn amrywiaeth eang o genres. Yr uchelgais yw cyflwyno’r awduron hyn mewn lleoliadau anffurfiol, agos-atoch i gynulleidfaoedd rhyngwladol ac i gynulleidfaoedd lleol, gwledig sy’n aml yn ynysig.

Mae Pamela Petro yn awdur, artist, ac addysgwr sy’n byw yn Northampton, MA. Cyhoeddwyd ei chyfrol ddiweddaraf, The Long Field, cofiant wedi’i osod yng Nghymru, yn y DU ym mis Medi 2021 gan Little Toller Books, a bydd yn cael ei gyhoeddi yn America yn Haf 2023 gan Arcade Books. Mae Pamela yn dysgu ysgrifennu creadigol yn Smith College ac ar Raglen MFA mewn Ysgrifennu Creadigol Lesley University, ac mae’n gyd-Gyfarwyddwr Ysgol Haf Dylan Thomas ym Mhrifysgol Cymru, y Drindod Dewi Sant, lle mae hi hefyd yn Gymrawd.

Mae Dominic Williams yn fardd, yn berfformiwr ac yn fentor creadigol. Mae Dominic hefyd yn darlithio yn Sefydliad Addysg a Dyniaethau Prifysgol Cymru Y Drindod Dewi Sant. Mae wedi dysgu ysgrifennu creadigol mewn sefydliadau eraill yn Iwerddon a Sweden. Ei gyhoeddiadau diweddaraf yw Pen & Paper: Punks in Print, traethawd darluniadol (Kultivera Productions, 2021) ac En galen man på tåget, casgliad o’i farddoniaeth wedi ei chyfieithu i Swedeg (Magnus grehn förlag, 2022).