Encil Sgwenwyr LHDTC+

Bob blwyddyn ers 2022, mae Llenyddiaeth Cymru wedi croesawu criw Llyfrau Lliwgar i Dŷ Newydd am encil i awduron LHDTC+ drwy gyfrwng y Gymraeg. Mae’r encil yn cael ei gynnig yn rhad ac am ddim i awduron, neu ddarpar awduron – does dim angen profiad helaeth o ysgrifennu i gymryd rhan.

Yn 2022, Elgan Rhys, Bethan Marlow a Llŷr Titus oedd yr ysgogwyr creadigol, a Megan Angharad Hunter yn awdur gwadd. Yn dilyn y penwythnos hwnnw, cyflwynodd sawl un a fynychodd yr encil eu gwaith i’w cynnwys yn y flodeugerdd LHDTC+ gyntaf yn y Gymraeg a gyhoeddwyd gan Gyhoeddiadau Barddas, Curiadau (2023).

Ym mis Tachwedd 2023, cynhaliwyd yr encil am yr eildro gyda Llio Maddocks a Leo Drayton yn ysgogwyr creadigol, a Paul Mendez yn awdur gwadd. Yn sgil y penwythnos hwnnw, daeth cyfle i’r mynychwyr gyfrannu gwaith ar gyfer zine newydd sbon o’r enw rhych newydd. Ariannwyd y cyhoeddiad gan grant cymunedol Cyngor Gwynedd a’i gyhoeddi ym mis Chwefror 2024, i ddathlu Mis Hanes LHDTC+. Ac fel rhan o ddathliadau Mis Balchder 2024 (mis Mehefin 2024), mae’r zine wedi’i gyhoeddi ar wefan Llenyddiaeth Cymru, yn rhad ac am ddim i’w islwytho isod.

Mae Encil Llyfrau Lliwgar yn dychwelyd am y pedwerydd tro rhwng 7–9 Tachwedd 2025 yn Nhŷ Newydd, Llanystumdwy. Eleni eto, cynhelir yr encil am ddim i bobl LHDTC+ sy’n ysgrifennu’n Gymraeg, gan gynnig lle diogel, cyfeillgar a chynhwysol i greu, cwrdd ag eraill, ac ymateb i ysgogiadau creadigol. Yn ystod yr Encil, ceir sesiynau gan dri ysgogydd creadigol – Megan Angharad Hunter, Lowri Hedd Vaughan, a Gareth Evans-Jones – a chyfle i gymryd rhan mewn sesiynau un-wrth-un.

Yn dilyn y penwythnos, cynhelir sesiwn Zoom ar 20 Tachwedd gyda’r awdur arobryn Daf James (Llwyth, Tylwyth, Lost Boys and Fairies). Ceir llety a bwyd am ddim yn Nhŷ Newydd, ond dim ond 12 lle sydd ar gael. Llenwch y ffurflen hon erbyn 1 Medi 2025.

Am ragor o wybodaeth, cysylltwch â Gareth Evans-Jones ar llyfraulliwgar@gmail.com