Dewislen
English
Cysylltu

Her 100 Cerdd #37: Tic Toc

Cyhoeddwyd Mer 2 Hyd 2019 - Gan Elinor Wyn Reynolds

Tic-toc, tic-toc,

 

mae amser yn rhedeg drwy fysedd y cloc,

sdim un eiliad yn eistedd ac aros yn llonydd,

maen nhw’n powlio a rowlio a rhedeg i’w gilydd

mae Awen ar goll, wedi dianc o’r tŷ

a neb adre nawr, neb, heblaw fi.

 

Tic-toc, tic-toc,

fe dasgodd munudau dros ymyl y cloc,

glanio’n garlibwns a chreu llanast mawr

pendilio yn feddwol ar ganol y llawr

yr unig sŵn glywyd oedd y drws yn cael slam

a sŵn sgidiau Awen yn pellhau gam wrth gam

 

Tic-toc, tic-toc

mae’r oriau yn llifo dros wyneb y cloc

a dim yn tycio, dim oll yn tocio,

mae Awen ’di gadael, ei bag wedi’i bacio,

a sdim gobaith caneri y daw hi ’nôl,

mae Awen ’di mynd, dim ond fi sydd ar ôl.

– Elinor Wyn Reynolds, 9.21 pm

Her 100 Cerdd 2019