Beirdd Cenedlaethol Cymru: Diolch, trosglwyddo awenau a throed ar y sbardun!
Dan arweiniad Cyfarwyddwr Artistig Llenyddiaeth Cymru, Leusa Llewelyn, roedd y digwyddiad hwn yn Nhŷ Newydd yn gyfle hefyd i ddiolch i Ifor ap Glyn am ei waith dros y chwe mlynedd ddiwethaf.
Dywedodd Leusa:
“Mae Ifor ap Glyn wedi bod yn Fardd Cenedlaethol Cymru ers 2016; ac yntau’n fardd a chyfathrebwr gwych mae Ifor wedi bod yn lysgennad medrus, brwdfrydig a hael i Gymru. Rydyn ni’n diolch yn fawr iddo am ei gyfraniad, am ei eiriau cywrain a sensitif a’i barodrwydd di-flino bob amser.”
Bu chwe blynedd Ifor ap Glyn yn Fardd Cenedlaethol Cymru yn rhai prysur ac amrywiol wrth iddo deithio’r byd yn perfformio, creu cysylltiadau a dathlu diwylliant Cymru. Bu ei gyfraniad mwyaf yng Nghymru; lluniodd gerddi i gofnodi achlysuron cenedlaethol ac arwain prosiectau amrywiol gan roi llwyfan i feirdd ac artistiaid eraill ein gwlad. Gellir gweld cerddi comisiwn Ifor ap Glyn a darllen am ei waith ar wefan Llenyddiaeth Cymru.
Bydd prosiect olaf Ifor ap Glyn yn ei rôl fel Bardd Cenedlaethol Cymru yn cael ei gyhoeddi ar-lein yn y dyddiau yn arwain at Ddiwrnod Barddoniaeth Cenedlaethol ar 6 Hydref. Prosiect sy’n dathlu ieithoedd Cymru yw Swdocw Iaith a bydd chwech cerdd fideo mewn chwe iaith yn cael eu cyhoeddi ar wefan Llenyddiaeth Cymru o 28 Medi ymlaen – cadwch lygad amdanynt!
Penodwyd Hanan Issa fel Bardd Cenedlaethol Cymru nesaf yn mis Gorffennaf ac ers hynny y mae wedi derbyn llu o gomisiynau am gerddi a gwahoddiadau i gymryd rhan mewn gwyliau, cynadleddau a phrosiectau lu. Cyhoeddwyd hefyd mai Hanan yw Cymrawd Rhyngwladol Gŵyl y Gelli 2022/23.
Mae Llenyddiaeth Cymru wedi comisiynu dwy gerdd arbennig ganddi, un yn trafod yr argyfwng costau byw sy’n effeithio nifer o unigolion a theuluoedd yng Nghymru ar hyn o bryd, a’r llall i nodi Diwrnod Alzheimer y Byd ar 21 Medi 2022. Dyma fwy o fanylion am bopeth sydd ar y gweill gan Hanan Issa ac Ifor ap Glyn yn mis Medi:
- Dydd Mawrth 20 Medi: Darlleniad o gerdd newydd gan Hanan Issa a gomisiynwyd gan Gyngor Celfyddydau Cymru fel rhan o ŵyl ar-lein Dychmygu’r Dyfodol. Bydd Hanan Issa yn darllen ei cherdd a Iestyn Tyne yn darllen ei gyfieithiad Cymraeg. Gellir cofrestru ar gyfer yr ŵyl yma.
- Dydd Mercher 21 Medi: Rhyddhau cerdd gan Hanan Issa i nodi Diwrnod Alzheimer y Byd
- Dydd Llun 26 Medi: Rhyddhau cerdd gan Hanan Issa ar thema yr argyfwng costau byw
- Dydd Mercher 28 Medi – dydd Mercher 5 Hydref: Cyhoeddi cerddi fideo Swdocw Iaith, prosiect dan arweiniad Ifor ap Glyn, yr olaf yn ei rôl fel Bardd Cenedlaethol Cymru.