Drws Mawr Coch

Dyma gerdd a fideo a grëwyd gan Casi, yr artist Efa Blosse-Mason a 12 o ddisgyblion Ysgol Gwent is y Coed.

Fe’u crëwyd fel rhan o brosiect Darn wrth Darn; prosiect partneriaeth gyda Mind Casnewydd a Maindee Youth wedi’i gyllido gan Comic Relief. Pwrpas y prosiect yw cefnogi teuluoedd a phobl ifanc gyda phroblemau iechyd meddwl, yn enwedig y rheiny o gefndir incwm isel, pobl Dduon, Asiaidd a Lleiafrifoedd Ethnig (BAME) neu sydd yn LHDTC+. Mae’r prosiect yn gweld awduron ac artistiaid yn cydweithio i greu cerddi, ffilmiau a phrosiectau cerddoriaeth i gefnogi’r teuluoedd hynny.

Drws mawr coch
yw’r porth i’n dychymyg,
ac ar bapur adennydd
awn ninnau ar daith,
dianc!
drwy goridorau
ein posibiliadau.

Tu ôl i’r drws?
Creaduriaid caredig,
eraill yn gas,
bwystfilod yn gwibio,
dynion hir-fain
yn hercio heibio.

Ymlaen, ymlaen i
losgfynydd o goch,
a’r afon boethaf
o dannau’n chwyrlio,
yn ffrio a fflamio.
Kloe ar ras
yn ei bagiau Channel
a’i hewinedd yn batrwm
swel, swel, swel.

Ymlaen, ymlaen
sŵn roced fawr ffyrnig
yn saethu
i fannau pellaf y gofod.
Steve y robot
sy’n dweud ‘helo’,
y gofodwr coll
sydd, Sh! ar ffo.

Ymlaen, ymlaen
i’r ystafell olaf.
Nodau rhyddhad,
wrth glywed gitar
yn swyno’r glesni,
hofran ar gwmwl,
arnofio’n y nen,
amser cau’r drysau
cyn i’r dydd ddod i ben.

Nôl i Cerddi Bardd Plant Cymru