Her 100 Cerdd #20: Y Drefn Naturiol

Y Drefn Naturiol

Deffrwch,

mae’r ddaear yn griddfan.

Mae’r dail wedi’u drysu.

Blodau’n agor i hadu

ffrwythau, cyn pydru’n

ara deg ar y coed

heb dyfu’n iawn.

Fe fuodd amser pan

oedd newid yn y Drefn Naturiol

yn peri gofid,

na fydde pethau’n troi,

na fydde pethau’n gweithio,

plannu, cyneafu, cneifio.

Ac aeth y pethau hynny’n angof

a throi’r drefn yn wynfyd.

Ond dywedodd neb wrth y ddaear

fod yr hen drefn wedi newid.

– Dyfan Lewis, 5.06pm