Dewislen
English
Cysylltu

Her 100 Cerdd #42: ‘Wales would never vote to leave UK’

Cyhoeddwyd Mer 2 Hyd 2019 - Gan Matthew Tucker

‘Wales would never vote to leave UK’

Cerdd yn ymateb i ddatganiad Alun Cairns uchod ar glawr y Western Mail (1/10/19)

 

T’mod beth Alun, ti’n llygad dy le!

 

Wast o beth yw’r holl orymdeithiau

lle bu’r Cymry’n eu miloedd

yn martsio’n danbaid trwy strydoedd

ein trefi a’n dinasoedd,

y ffyliaid yn ffrwydro’u gwladgarwch

i bawb gael ei gweld ym mhobman.

 

Na chwaith yr holl gynghorau

a fu’n datgan eu hawydd

i godi’r ddraig uwch eu cymunedau,

na’r ffaith fod fwyfwy o Gymry’n

bwrw’u croesau dros Blaid Cymru!

 

Breuddwydwyr ffôl ydyn ni

sy’n credu’r gwrthwyneb!

 

Ddaw ddim byd o hynny sbo’

oherwydd na fydd Cymru fyth

yn datgan ei hannibyniaeth!

– Matthew Tucker, 10.21 pm

 

Her 100 Cerdd 2019