Her 100 Cerdd #45: Mentra Gwen
Cyhoeddwyd Mer 2 Hyd 2019
Mentra Gwen
Chei di ddim yn y bywyd hwn oni bai bo’ ti’n mentro,
os nad achubi di ar bob cyfle,
ddaw dim ohono
os na wnei di drio.
Ond wedi geiriau dewr llawn brafado … go iawn …
mae’n siŵr y gwnei di bwyllo … y gwnei betruso …
aros … pendroni …
achos …
mae’r galon yn curo’n gynt
y tymheredd yn cynyddu,
bydd d’ysgyfaint yn dwyn dy wynt
a’r chwys yn cronni
ac fe deimli’n hollol allan o dy ddyfnder …
Bryd hynny, ga i gynnig cyngor i ti?
Anadla …
a bwria i’r dwfn … nofia … dal ati …
achos os nad ti, yna pwy?
– Elinor Wyn Reynolds
