Bwrdd Ymddiriedolwyr

Mae Steve Dimmick yn fachgen o Blaina. Ei dad, sefydlydd Poems and Pints ym Mlaenau Gwent, wnaeth ysbydoli ei gariad at eiriau. Mae Steve yn rhedeg clwb llyfrau CardiffRead, clwb darllen a thrafod mwyaf hirhoedlog y ddinas. Yn rhinwedd y rôl hon mae wedi croesawu pobl fel Manon Steffan Ros, Chris Power, Owen Sheers, Belinda Bauer, Lemn Sissay a llawer mwy trwy ddrysau Llyfrgell Treganna. O ddydd i ddydd, mae’n dad i dri o blant, ac yn eistedd fel Rhiant-Lywodraethwr yn Ysgol Plasmawr. Mae Steve hefyd wedi bod yn Ymddiriedolwr gyda National Theatre Wales, gan eu helpu i drosglwyddo i Welsh National Theatre dan arweiniad Michael Sheen, yn dilyn colli cefnogaeth Cyngor Celfyddydau Cymru i NTW.

Ac yntau’n hoff o ieithoedd, cyrhaeddodd Steve rownd derfynol Dysgwr Cymraeg y Flwyddyn yn 2018. Fel Cyfarwyddwr Masnachol Ymddiriedolaeth Ddiwylliannol Awen, cylch gwaith Steve yw Gwneud Bywydau Pobl yn Well; rhywbeth y mae’n gobeithio ei gyflawni fel Ymddiriedolwr gyda Llenyddiaeth Cymru.

Gydag MSc mewn dealltwriaeth gyhoeddus o wyddoniaeth, a dros 15 mlynedd o brofiad mewn cyllid amgylcheddol yn y sector cyhoeddus, mae Joanne Doyle yn cael ei hysgogi gan ddulliau systemau a all ddod â gwahanol safbwyntiau i ddylanwadu ar ddyfodol teg. Cyn gweithio yn y sector cyhoeddus, mae hi wedi treulio cyfnodau’n gweithio i sefydliadau nid er elw yn cefnogi datblygiadau sefydliadol a phartneriaethau. Mae hi’n gweld y celfyddydau fel sylfaen ar gyfer ymarfer dychymyg creadigol sy’n gallu dathlu amrywiaeth, cynhwysiant a dulliau eraill sy’n hanfodol i adeiladu dyfodol cynaliadwy. Wedi'i geni yn Iwerddon ac astudio yn Llundain, mae Joanne bellach yn byw ym Mro Morgannwg.

Daw Sioned Wiliam yn wreiddiol o’r Barri. Hi yw awdur Dal i Fynd, Cicio’r Bar, Y Gwyliau a Chwynnu. Dechreuodd ei gyrfa yn y BBC, cyn mynd i weithio fel cynhyrchydd annibynnol ar rhaglenni fel Tonight with Jonathan Ross, Game On, Big Train a Yonderland. Fe gynhyrchodd hi iDot a Rhestr Nadolig Wil i Boom/S4C gan ennill gwobr BAFTA Plant. Fe’i henwebwyd hi am wobr BAFTA dair gwaith ac fe enillodd hi British Comedy Award a Rhosyn Efydd ym Montreux fel cynhyrchydd BIG TRAIN yn 1999. Mae hi wedi gweithio fel Comisiynydd Comedi i ITV a BBC Radio 4. Yn ddiweddar bu’n gweithio fel Prif Weithredwr (Dros Dro) S4C. Mae hi’n Gymrawd ym Mhrifysgol Aberystwyth ac yn Gyfarwyddwr Anweithredol gyda Cwmni Da.

Mae Charlotte Williams OBE FLSW yn awdur ac yn feirniad academaidd a diwylliannol. Mae ei hysgrifau yn rhychwantu cyhoeddiadau academaidd, cofiant, ffuglen fer, adolygiadau, traethodau a sylwebaeth. Mae Charlotte wedi ysgrifennu dros bedwar ar ddeg o lyfrau academaidd, gyda’i chasgliad golygedig ‘A Tolerant Nation? Ethnic Diversity in a devolved Wales (2003 & 2015) yn un o’i theitlau mwyaf nodedig. Mae ei gweithiau ffeithiol greadigol yn cynnwys ei chofiant arobryn Sugar and Slate (Llyfr y Flwyddyn 2003) a ailgyhoeddwyd yn 2022 gan Parthian ar gyfer y Library of Wales Series, ac eto yn 2023 gan Penguin fel rhan o’u Black Britian Writing Back Series. Mae Charlotte yn Athro Emeritws ym Mhrifysgol Bangor ac mae ganddi gymrodoriaethau er Anrhydedd ym Mhrifysgol Wrecsam, Prifysgol De Cymru a Phrifysgol Fetropolitan Caerdydd. Mae’n aelod o Gymdeithas Ddysgedig Cymru, yn Gyfarwyddwr anweithredol i Estyn ac yn Gynghorydd i Llywodraeth Cymru ar weithrediad Cynllun Gweithredu Gwrth-hiliol Cymru.