Er mwyn dathlu Dydd Miwsig Cymru eleni, aeth y Bardd Plant ati i gyfansoddi cân wedi ei ysbrydoli gan weithdai arbennig gyda phlant yn Ysgol Gymraeg Ystalyfera Bro Dur ac Ysgol Gynradd Gymraeg Cwmllynfell yn Sir Castell Nedd a Phort Talbot. Roedd y gân a’r gweithdai yn canolbwyntio ar Chwedl Cuhlwch ac Olwen, a’r afon Twrch, sydd yn ymddangos yn y chwedl. Dyma un o weithgareddau Siarter Iaith prosiect Bardd Plant Cymru, sydd wedi eu clustnodi i ysbrydoli plant a phobl ifanc i ddefnyddio’r Gymraeg ym mhob agwedd ar fywyd.
Mewn partneriaeth â BBC Radio Cymru, aeth Casi ati i recordio’r gân, ac fe gafodd ei chwarae ar raglen Shân Cothi ar y 4 Chwefror i nodi Dydd Miwsig Cymru.
Dros y Mynydd Du,
heibio afon Llynfell
cyn cyrraedd afon Twrch,
ymddangosa’r peth rhyfedda’
yno’n gorffwys a hamddena,
creadur hardd a hudol
ydyw hwn.
Dilyn y dyfroedd
tua’r cwm,
lle bydd ein hafonnydd yn cwrdd,
chwedl ddoe
sy’n dal i siapio’r tir,
yn adlewyrchiad mân y dŵr
a deimli dithau’r gwir?
Carlamu wna’r marchogion,
yn y niwl
cuddia ddirgelion,
olion camau cyfrwys
y twrch trwyth,
crib o liwiau’r heulwen
sy’n sgleinio drwy’r ffurfafen,
dyma’r unig allwedd
os am ennill cariad Olwen.
Dilyn y dyfroedd
tua’r cwm,
lle bydd ein hafonnydd yn cwrdd,
chwedl ddoe
sy’n dal i siapio’r tir,
yn adlewyrchiad mân y dŵr
a deimli dithau’r gwir?